Iphephabhuku leMina Lawe
Iphephabhuku iMina Lawe liqhukethe indaba ezitshiyeneyo, ezilomfutho, ezifaneleyo njalo ezijonge ukulimukisa kanye lokuthuthukisa abesifazane ikakhulu labo abasakhasayo kwezomnotho kweleZimbabwe. Iphephabhuku lethu lihamba phambili kundaba zabomama ezilotshwe ngobuciko langesiNtu.
Iphephabhuku leli lilotshwe ngendimi ezimbili, isiNdebele lesiShona ngenjongo yokuthi abesifazane bakuleli bazwisise. Sigxile kakhulu endabeni eziphathelane lezentuthuko, ubulili, okwenzakala ezabelweni, ukukhuthazana kanye lezokuzithuthukisa.
Indaba esizilobayo kuleli phephabhuku sizithapha ezabelweni ezitshiyeneyo zakuleli kugoqela emaphandleni lasemadolobheni lapho esiyabe sethekelele khona. Intatheli kanye labahleli bethu balolwazi lobungcitshi bokuloba izindaba kanye lokuzipapatsha ngendlela elohlonzi lwaphezulu. Sikholelwa ekuthini abesifazane bonke kumele imibono yabo yazakale kungakhathalekile ukuthi bakhuluma luphi ulimi, balombala bani, ukholo lwabo kanye lamasiko abo. Iphephabhuku lethu limumethe njalo lendaba zemidlalo, ezokuzithokozisa lezinye nje indaba ezihlabusayo ngenjongo yokuthokozisa ababali bephephabhuku lethu.
Ababali
Ababali bephephabhuku lethu sikhangelele ukuthi babe ngabesifazane abaleminyaka ephakathi kwelitshumi lesithupha kusiya kwabaleminyaka engamatshumi ayisikhombisa (16-70) abafisa ukuthuthuka ngokubala mayelana ngenhambo zabanye abesifazane ebasendaweni ezitshiyeneyo asebezithuthukisile kuleli. Abesilisa labantwana labo asibatshiyi phandle ngoba labo bamqoka kwezentuthuko ezabelweni.
Mayelala Ngathi
IMina Lawe/Ini Newe ngeyokwabelana imininingwane kanye lokuxoxisana kwabantu ikakhulu abesifazane abahlala emaphandleni labanye abahlala endaweni ezibucwadlalana lamadolobha akulelilizwe leZimbabwe.
Thina abe Mina Lawe/Ini Newe silangazelela ukuletha intuthuko ebantwini, ezigabeni laselizweni lonke jikelele. Lokhu sijonge ukukwenza ngokuletha inkuthazo emphakathini ngokuveza imisebenzi eyenziwa ngabanye abahlala kwezinye izigaba zakuleli. Ekwenzeni lokhu sizasebenzisa ingwalo kanye lokufaka olunye ulwazi ngentuthuko ebulenjini. Sikhangela kakhulu ngezentuthuko, ezobulili, ezomnotho, lezinye nje indaba ezingakhulisa lokuthuthukisa imicabango yomuntu.
Thina ke sikholelwa ekuthini owesifazane angathuthuka isizwe sonke siyathuthuka, yikho nje sikhangela kakhulu abesifazane. Injongo yethu yikukhuthaza abesifazane lomphakathi ngokubethulela indaba eziphathelane lenhambo ezihanjwe ngabanye abakwezinye indawo ikakhulu sikhangela ubunzima abantu abahlangana labo lokuthi benelisa njani ukuphuma kulobobunzima.
Kuyisifiso sethu ukuletha utshintsho engqondweni zabantu ukuze abantu bengahlali behlulukelwe kodwa babe lemicabango emihle ebanika ithemba lamandla okusebenza ukuze bathuthukise impilo zabo, kungelani lokuthi ungubani njalo uvela kusiphi isabelo elizweni. Ekwenzeni imizamo yokuthi ulwazi esilwabelanayo lufike ebantwini bonke silephephabhuku elithiwa yiMina Lawe/Ini Newe elilotshwe ngendimi ezimbili, IsiNbebele lesiShona. Leliphephabhuku lisabalale ezabelweni zonke zakuleli.
Sifisa njalo ukuthi amazwi avela kwabesifazane kanye lomphakathini abe yiwo asetshenziswa ekubunjweni kwemithetho lentuthuko yelizwe. Ngokuxoxisana lani sisebenza ndawonye lentatheli ezizinikeleyo labanye abalolwazi ngendlela ezintsha ezisetshenziswa ukuthapha izindaba, sizabambisana ndawonye sililethela imibono, imicabango lenkuthazo evela ikakhulu kubomama lengcosana yabobaba abahlala emaphandleni lasemadolobheni akuleli.
Umbono
IMina Lawe/Ini Newe izinikele ekuboneni abantu bonke bethola ulwazi, bephathwa ngendlela efananayo, besebenza ndawonye njalo belolwazi lwalokho abenelisa ukuzenzela khona ukuze baguqule impilo zabo.
Imisebenzi
Ukunika omama kanye lomphakathi indawo yokuthi batsho imibono lemicabango yabo ezindabeni. Indlela esizayisebenzisa ukwenza lokhu yikugxila kakhulu ekupheni umphakathi ithuba lokukhuluma, sinika ebesifazane labesilisa amathuba afanayo awokuveza ngokwenzakala empilweni zabo lentuthuko yezigabeni zabo sisebenzisa indlela ezintsha lezindala zokwabelana izindaba.
Imisebenzi le izaphunyeleliswa yikuzinikela ekubeni lemiphumela ngokwenza okulandelayo:
- Ukuqoqwa kwendaba ezivela emphakathini ikakhulu emakhaya lasemadolobheni sisebenzisa indlela ezintsha lezindala zokusabalalisa izindaba.
- Ukubumba ubudlelwane labanye abantu kumbe inhlanganiso ukwenzela ukusekela imisebenzi yethu.
- Ukwabelana ulwazi kusetshenziswa indimi ezintathu zakulelilizwe leZimbabwe isiNdebele, isiShona leSingisi njalo yizo lezindimi ezizasetshenziswa ekulotshweni kwezindaba lekuxoxeni.
- Ukuqaphelisisa lokuhlola ukuqhuba kwendlela ezizasetshenziswa yi IniNewe/Mina Lawe ukuhambisa imininingwane kanye lokuxoxisana kwabantu sisebenzisa indlela zakuleli kanye lezakwanye amazwe ezisetshenziswa ukwenza lokhu.
Esikuqhakathekisayo
- Ukuba leqiniso
- Ukungabi lobandlululo
- Ukungakhangeli phansi abantu
- Ukwenza okulungele umuntu wonke
- Ubuqotho
- Inhlonipho
- Ukuthembeka
- Ukuziphendulela lokuzimela
- Ukuhlonipha umehluko ebantwini
- Ukuhlonipha ubulili
Esibambisana labo kubhizimusi
IMina Lawe/Ini Newe, yinhlanganiso engelani lezombangazwe, yinhlanganiso ezimisele njalo ukubona omama labobaba abasezigabeni ezehlukeneyo bethola ulwazi, besenza okulungele wonke umuntu njalo besebenza ndawonye ukuze baphumelele ngokugcweleyo. Sikhangelele ukusebenza ndawonye labanye abantu abalemicabango efana leyethu, abafisa njalo lokubona omama besenelisa ukuzimela kwezentuthuko. Laba kumele babe ngabantu abajonge ukubona umbono wethu uphumelela.
Xhumana lathi
Please use this form for all general inquiries.