Dzandura village projects: Ellen Kaminyu

Unkosikazi Ellen Kaminyu oleminyaka engamatshumi amahlanu (50) njalo ehlala esiqintini seDzandura koSeke uthi inhlelo ezenziwa yinhlanganiso yeSelf Help Development Foundation (SHDF) zilusizo kakhulu empilweni yakhe.

“Ngiyababonga abeSHDF, yonke inotho engilayo ngayithola  ngenxa yosizo engangiluthola enhlanganisweni yabo.”

UNkosikazi Kamunyu ulabantwana abane njalo waba lilunga elipheleleyo lenhlanganiso yeSHDF kusukela ngomnyaka ka1992. Waqala ke yena ehambisa i 20c ngeviki eqenjini lakhe lokutshayelana imali. Imali le babeyibolekisa beyizalisa beliqembu besebeyabelana ngemva kwenyanga eziyisithupha.  UNkosikazi Kaminyu wenelisa ukuqala ibhizimusi lokufuya inkukhu ngemali ayeyithola ngokutshayelana imali labanye. Ngomnyaka ka 2004 UNkosikazi Kaminyu wenelisa ukuthenga indlu elamakamelo ayisikhombisa elokitshi ni leTafara eHarare kodwa kazange athande ukuyahlala edolobheni wakhetha ukugcina umuzi wakhe.

“Ngajabula kakhulu ukuba ngumama osezimele kwezomnotho kodwa angizange ngithande ukutshiya umuzi wami ngiyehlala edolobheni ngafaka amaloja kungakho ngithola imali evela emalojeni  ekupheleni kwenyanga njalo imali esengiyithola isisiba nengi sengihlanganisa laleyi engiyizuza kubhizimusi lami lenkukhu.” Watshonjalo ke uNkosikazi Kaminyu.